Psa 139 | WSK | STEP | Kari Biya, ni aninga angamang ari saperem, ale ninguru aga ikisam.

Psalms 139

Kaem ana ninguru nanga ikiam ale nanga sinar taso ko den

(Devit ko wur bo)

1 Kari Biya, ni aninga angamang ari saperem, ale ninguru aga ikisam.

2 Ani dagiwasam mu ni ikiwasam, aking ani barasasam mu aga ikiwasam.

Ni awar biya ware aninga ikia suen la ariwasam.

3 Ani ura iluwasam agi, aniwasam agi, mu ni ariwasam,

ale aninga betera kaora mu suen la ni ikiwasam.

4 Den ani agiring te aratukko, mu ni girisam ikiwasam se ani balsam.

5 Ni ani abiring ko, amake ko, pingi bagasam,

ale ka kiting mu karem iwita te aga ira mursam.

6 Ni ani ninguru aga ikisam.

Nika ikia kualala biya nunguningkiri, se aninga ikia karogo me terong mam.

7 Ani aparete namirik ale ni motam ko yumurikko?

Ale ani aparete namirik ale ni kema te mena?

8 Ani duruk wonong te nama tarigirik, bare ni te bagasam.

Aking kariimet kuera nunga nuguwim te namirik, bare mu ni te bagasam tala.

9 Se ani bungek worem te basuso mu te namirik agi,

ani awar biya worem te nama kaposo te namirik bagirik agi,

10 bare mu te betela nika kiting te aga sinar towerko,

ale ka kiting sengam mu te aga iluwerko.

11 Ani tiromorom tairuk aga ira kaluwurokko balik,

ale nikitang te bagasam mu turom ko geragukko balik,

12 bare tiromorom mu nika motam te tiromorom mena,

se turom mu woremkalal iwita nikitang biya,

se turom se woremkalal mu nika motam te koma suwanta.

13 Ni aninga angimik nuamur tutuk suen la nungem,

ale angimik singir la ayam tuagu ningi nungem.

14 Se ani ni nip patowasam, mu awuk, ni yawarakala aga nungem.

Mel suen biya ni betesam mu kigilikta nunguning se yawarakala,

mutang ani ninguru ko ikisam, ale ko nika nguanga se nip patowasam.

15 Tom ani ayam tuagu ningi yumura te lagawakasam,

se aga angimik sokel aratu aratu namawakaso, mu ni agarkiwakasam.

16 Ni girem aga ikiwerem se udagi bilangerem.

Tom ani me aratem la, ni girem ale aga tom ali imi te bagirikko mu bataguru beterem se aniram.

17 O Kaem, nika ikia suen biya bare ani ko iki kutuwurikko me terong!

Nika ikia suen biya nunguningkiri!

18 Se ani nunga kaurik bare suen biya nunguningkiri, langi saun ko tom kiaram.

Tom ani aniwa maragasam, mu ani am nikarak la.

19 O Kaem, aninga angamang ni kari memek nunga moarko,

ale kari nuguting gue ago mu aninga angimik duap te mu tagi tamonko.

20 Nuna nika nip balu maguwusan, ale den memek memek ni ko ko balsan.

21 O Kari Biya, saki alo ni me ka kuesan, mu ani me nunga kuesam.

Ale saki alo ni kiring batogarsan, mu nogo ko angamang magoso.

22 Ani me nunga kuesam nunguningkiri.

Ani nungarkasam, mu agata aga kager kari alo iwita.

23 O Kaem, ni aninga bagara tuterko,

ale aga ira arik ale aga ikia suen la ninguru arikko!

24 Ale ikia memek agate aniruk mu arikko!

Ale marak tom suen biya te bagara ko lage bare te aga diruwur se namirikko.